www.payamewatan.com
 

 

 

صفحۀ اصلی

 

تاریخ نشر:08.09.2007

  
    ما دشهید
ډاکتر نجیب الله دشهادت دریمې او څلورمې کلیزې ته دوه شعره لیکلی وه٬ خو تر اوسه چیرته خپاره شوی ندي دادی چې دنجیب الله او ځوانیمرګ احمدزي دشهادت دیوولسمې کلیزې په درشل کې یو دخپراوي په منظور یې دوطن پیغام سایت ته استوم . داچې دشاعرانه خیال له پلوه ناتوانه دي دلووستونکو څخه یې بښنه غواړم .

به درنښت

ک. کمال

۱

دوطن تاریخ کې بله پاڼه سره شوه
چې په دار یې دختلو اوازه شوه

څنګه مړ نه شوې له دې غمه کابله!؟
درکې مړه چې دخلاصون بله ډیوه شوه

ما هم پریښوده په چیغو ترینه لاړم
چې لولۍ ډمه په کلی میلمنه شوه

درندانو دامید خونه شوه ړنګه
ساقي لاړه رانسکوره پیمانه شوه

 سل مې خیر وه خو دسلو سردار لاړه
چې په تګ یې زمونږ شاړه میخانه شوه

دمنصور ارواح یې مخ ته سلامي ځي
دجوړه ورونو چې پورته جنازه شوه

دوطن شهیدان ټول سر په تعظیم ږدي
دډاکتر چې دورتللو هنګامه شوه

دوطن دپاره دار دې چې قبول کړ
دکفن سره دتا وعده پوره شوه

پهلوانه! دوطن دسهار ستوریه
بې له تانه پر مونږ
 ډیره لویه شپه شوه

داحمداو دامان او ستا ټاټوبی
وروسته ستا نه ددښمنو مسخره شوه

لوټ کاروان به کوم خوا درومي اوسکماله
سالار لاړه بې سالاره قافله شوه

 

۲

لوړ مراد ته رسیدل دې مبارک شه
په سرو وینو لمبیدل دې مبارک شه

دوطن په شهیدانو کې تاجداره
فرښتو سره خندل دې مبارک شه

ای دسولې دکاروان ستره سالاره!
تل په زړو کې اوسیدل دې مبارک شه

دټیټ ژوند او دجګ مرګ حلقو په منځ کې
حلقې جګې ته ختل دې مبارک شه

چې بلیږي دې ډیوې تل په مزار کې
دډیوو دا بلیدل دې مبارک شه

چې په توره شپه دې نوش دمیو جام کړ
ددې جام پورته کول دې مبارک شه

په نشه نشه کې لاړې تر اسمانه
دې مقام ته رسیدل دې مبارک شه

ته چې لاړې پسرلي درسره لاړل
پسرلو سره دا تلل دې مبارک شه

شپه دې وویشته دسرو وینو په ستورو
قهرمانه! دا ویشتل دې مبارک شه

ټوله وسوې لکه شمعه سر تر پایه
سوې شمعې سوزیدل دې مبارک شه

چې دې ولیکله ستر اتل شهید ته
ایکماله دا غزل دې مبارک شه

 

 

   بازگشت به صفحۀ اصلی